ଏକ ମର୍ମନ୍ତୁଦ ସଡ଼କ ଦୁର୍ଘଟଣା-୩ ଜଣ ବାଇକ୍ ଆରୋହୀଙ୍କ ମୃତ୍ୟୁ-କେନ୍ଦୁଝର

କେନ୍ଦୁଝର: କେନ୍ଦୁଝର ଜିଲ୍ଲା ଚମ୍ପୁଆ ଥାନା ଅନ୍ତର୍ଗତ ଏନଏଚ୍‌-୨୧୫ର ଆଙ୍ଗୁଳିଆ ଛକରେ ଗତକାଲି ରାତି ପ୍ରାୟ ଗୋଟାଏରୁ ଦୁଇଟା ମଧ୍ୟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଅଜଣା ଗାଡ଼ି ଧକ୍କାରେ ୩ ଜଣ ବାଇକ୍ ଆରୋହୀଙ୍କ ମୃତ୍ୟୁ ଘଟିଛି। ଦୁଇଜଣଙ୍କ ପରିଚୟ ମିଳିଛି। ସେମାନେ ହେଲେ ବାରିଆ ଥାନା ଗିଧିବାସର ରଞ୍ଜିତ ନାୟକ ଓ ଝାଡ଼ଖଣ୍ଡର ଶଢ଼େଇକଳା ଅଞ୍ଚଳର ଅମରନାଥ ପତି। ଅନ୍ୟଜଣଙ୍କର ପରିଚୟ ମିଳିପାରି ନାହିଁ। ଏ ତିନି ଜଣ ଯାକ ଗୋଟେ ବାଇକ୍‌ରେ  ରିମୁଳିରୁ ଯୋଡ଼ା ଅଭିମୁଖେ ଯାଉଥିଲେ।  ଘଟଣାସ୍ଥଳରେ ହିଁ ୩ଜଣଙ୍କର ମୃତ୍ୟୁ ଘଟିଥିଲା। ଚମ୍ପୁଆ ପୋଲିସ୍ ଘଟଣା ସ୍ଥଳରେ ପହଞ୍ଚି ତଦନ୍ତ କରୁଛି। ପୋଲିସ୍ ପକ୍ଷରୁ କୁହାଯାଇଛି,“ଏହି ରାସ୍ତାରେ ବିଳମ୍ବିତ ରାତିରେ ସବୁବେଳେ ଯୋଡ଼ାରୁ-କେନ୍ଦୁଝରକୁ ଆଇରନ୍‌ ବୋଝେଇ ଟ୍ରକ୍‌ ଯାତାୟତ କରିଥାଏ।  ବିଳମ୍ବିତ ରାତିରେ ତିନିଜଣ ବାଇକ୍‌ ଆରୋହୀ ଗୋଟିଏ ମଟର ସାଇକେଲରେ ରିମୁଳିରୁ ଯୋଡ଼ା ଆଡ଼କୁ ଯାଉଥିଲା ବେଳେ ଆଇରନ୍ ବୋଝେଇ ଟ୍ରକ ଅବା ଅନ୍ୟ କୌଣସି ଗାଡ଼ି ଏମାନଙ୍କୁ ଧକ୍କା ଦେଇ ଚାଲି ଯାଇଛି।”