ଡାକ୍ତରଙ୍କୁ ମାଡ଼ ମାରିଥିବା ର ପ୍ରତିବାଦରେ ଆଜି ମେଡ଼ିକାଲ କର୍ମଚାରୀମାନେ ଧାରଣା ଦେଇଛନ୍ତି-ଖଲିକୋଟ ସ୍ୱାସ୍ଥ୍ୟକେନ୍ଦ୍ର

ବ୍ରହ୍ମପୁର: ଖଲିକୋଟ ସ୍ୱାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଅଧିକାରୀ ଡ଼. ସୁଦର୍ଶନ ସାହୁଙ୍କୁ ମାଡ଼ ମରାଯାଇଥିବା ଅଭିଯୋଗ ହୋଇଛି। ଗୁରୁତର ଅବସ୍ଥାରେ ତାଙ୍କୁ ବ୍ରହ୍ମପୁର ବଡ଼ ମେଡ଼ିକାଲରେ ଭର୍ତ୍ତି କରାଯାଇଛି। ଏନେଇ ଅଭିଯୋଗ ହେବା ପରେ ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ଗତକାଲି ବିଳମ୍ୱିତ ରାତିରେ ସୁରେନ୍ଦ୍ର ପଲେଇ ନାମକ ଜଣେ ବ୍ୟକ୍ତିଙ୍କ ସ୍ତ୍ରୀ ପ୍ରସବ ପାଇଁ ସ୍ୱାସ୍ଥ୍ୟକେନ୍ଦ୍ରକୁ ଆସିଥିଲେ। ସ୍ୱାସ୍ଥ୍ୟ ଅବସ୍ଥା ସଙ୍କଟାପନ୍ନ ରହିଥିବା ଦେଖି ଡାକ୍ତର ସାହୁ ତାଙ୍କୁ ବ୍ରହ୍ମପୁର ବଡ଼ ମେଡ଼ିକାଲକୁ ନେଇଯିବା ପାଇଁ ପରାମର୍ଶ ଦେଇଥିଲେ। ଏଥିରେ ସୁରେନ୍ଦ୍ର ଓ ଅନ୍ୟ ତିନି ଜଣ ଉତ୍‌କ୍ଷିପ୍ତ ହୋଇ ଡାକ୍ତର ସାହୁଙ୍କୁ ମାଡ଼ ମାରିଥିଲେ। ଏନେଇ ଡାକ୍ତର ସାହୁ ଖଲିକୋଟ ଥାନାରେ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରି ସମ୍ପୃକ୍ତ ୩ ଜଣଙ୍କୁ ଅଟକ ରଖି ପଚରା ଉଚୁରା ଚଳାଇଛି। ଏହାର ପ୍ରତିବାଦରେ ଆଜି ମେଡ଼ିକାଲ କର୍ମଚାରୀମାନେ ଧାରଣା ଦେବା ସହ ଆକ୍ରମଣକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି। ଖବର ପାଇ ଖଲିକୋଟ ତହସିଲଦାର ଓ ସିଡ଼ିଏମ୍ଓ ଘଟଣାସ୍ଥଳରେ ପହଞ୍ଚି ଧାରଣାରେ ବସିଥିବା କର୍ମଚାରୀଙ୍କୁ ବୁଝାଶୁଝା କରିଥିଲେ।