ନୂଆ ପୋଲିସ ଡିଜି ଭାବେ ଡାକ୍ତର ରାଜେନ୍ଦ୍ର ପ୍ରସାଦ ଶର୍ମା ଦାୟିତ୍ୱ ଗ୍ରହଣ -କଟକ

କଟକ: ଆଜି ନୂଆ ପୋଲିସ ଡିଜି ଭାବେ ଡାକ୍ତର ରାଜେନ୍ଦ୍ର ପ୍ରସାଦ ଶର୍ମା ଦାୟିତ୍ୱ ଗ୍ରହଣ କରିଛନ୍ତି। କଟକସ୍ଥିତ ପୋଲିସ ମୁଖ୍ୟାଳୟରେ ଦିନ ସାଢ଼େ ୧୧ଟା ବେଳେ ସେ ଦାୟିତ୍ୱ ନେଇଛନ୍ତି। ଏହି ଅବସରରେ ତାଙ୍କୁ ଗାର୍ଡ ଅଫ୍ ଅନର ଦିଆଯାଇଥିଲା। ନୂଆ ଡିଜିପିଙ୍କୁ ସ୍ୱାଗତ ପାଇଁ ବହୁ ବରିଷ୍ଠ ପୋଲିସ ଅଧିକାରୀ ରାଜ୍ୟ ପୋଲିସ୍ ହେଡ୍‌କ୍ବାର୍ଟରରେ ଉପସ୍ଥିତ ଥିଲେ। ଗତକାଲି ରାଜ୍ୟ ସରକାର କେ.ବି.ସିଂଙ୍କ ସ୍ଥାନରେ ଡାକ୍ତର ଆର.ପି. ଶର୍ମାଙ୍କୁ ଓଡ଼ିଶାର ନୂଆ ପୋଲିସ୍ ଡିଜି ଭାବେ ନିଯୁକ୍ତି ଦେଇଥିଲେ। ଡାକ୍ତର ଶର୍ମା ଏହି ଗୁରୁ ଦାୟିତ୍ବ ସମ୍ଭାଳିବା ପୂର୍ବରୁ ଆଜି ସକାଳେ ଭୁବନେଶ୍ୱର ସ୍ଥିତ ଲିଙ୍ଗରାଜ ମନ୍ଦିରକୁ ଯାଇ ସେଠି ଆଶୀର୍ବାଦ ଭିକ୍ଷା କରିଥିଲେ।

ନୂଆ ଡିଜିଙ୍କ କ୍ୟାରିୟର

ଡାକ୍ତର ଆର.ପି. ଶର୍ମା ହେଉଛନ୍ତି ୧୯୮୬ ବ୍ୟାଚ୍‌ର ଓଡ଼ିଶା କ୍ୟାଡର ଆଇପିଏସ୍‌ ଅଫିସର। ୨୦୧୬ ଜାନୁଆରୀରେ ରାଜ୍ୟ ସରକାର ତାଙ୍କୁ ଭିଜିଲାନ୍ସ ଡିଜି ଭାବେ ଅବସ୍ଥାପିତ କରିଥିଲେ। ଏହା ପୂର୍ବରୁ ସେ ପ୍ରାୟ ୨ ବର୍ଷ ୫ ମାସ ଧରି ଟ୍ବିନସିଟି  କଟକ-ଭୁବନେଶ୍ୱରର ପୋଲିସ୍ କମିଶନର ଭାବେ ଦକ୍ଷତାର ସହ ଦାୟିତ୍ୱ ତୁଲାଇଥିଲେ। ଏସ୍‌ପି ଭାବେ ସେ ପ୍ରଥମେ କଳାହାଣ୍ଡି ଜିଲ୍ଲାରେ କାର୍ଯ୍ୟ ଆରମ୍ଭ କରିଥିଲେ। ୧୯୯୭ରେ ସେ ଜାତିସଂଘର ସପୋର୍ଟ ମିଶନ୍‌ରେ ହାଇତି ଯାଇଥିଲେ। ୨୦୦୪ରେ ସେ ଦିଲ୍ଲୀକୁ ଡେପୁଟେସନ୍‌ରେ ଯାଇ ନ୍ୟାସନାଲ୍ ସିକ୍ୟୁରିଟି ଗାର୍ଡ- ଏନ୍‌ଏସ୍‌ଜିରେ କାର୍ଯ୍ୟ କରିଥିଲେ। ଡାକ୍ତର ଶର୍ମାଙ୍କ ଘର ରାଜସ୍ଥାନର ଆଜମେର୍‌ରେ। ଆଇପିଏସ୍ ପାଇବା ପୂର୍ବରୁ ସେ ଏମ୍‌ବିବିଏସ୍‌ ଡିଗ୍ରୀ ମଧ୍ୟ ହାସଲ କରିଥିଲେ।

ଡିଜି ଦାୟିତ୍ୱ ନେବା ପରେ  ଆରପି ଶର୍ମା କହିଛନ୍ତି- “ ରାଜ୍ୟ ପୋଲିସର ମୁଖ୍ୟ ଭାବେ ମତେ ଏକ ବଡ଼ ଦାୟିତ୍ୱ ଦିଅଯାଇଛି। ଅପରାଧୀମାନେ ନୂଆ ଟେକ୍ନୋଲୋଜି ବ୍ୟବହାର କରି ଅପରାଧ କରୁଛନ୍ତି। ସେମାନଙ୍କୁ ଚ୍ୟାଲଞ୍ଜ କରିବା ପାଇଁ ଆମକୁ ଲାଟେଷ୍ଟ ଟେକ୍ନୋଲୋଜି ବ୍ୟବହାର କରିବାକୁ ପଡ଼ିବ। ଥାନା ଗୁଡ଼ିକରେ ଜଣେ ସାଧାରଣ ଲୋକ କିପରି ଭଲ ବ୍ୟବହାର ପାଇବ ସେ ଦିଗକୁ  ଗୁରୁତ୍ୱ ଦିଆଯିବ। ମୁଖ୍ୟମନ୍ତ୍ରୀଙ୍କ ଥ୍ରୀ-ଟି ଭିଜନ୍ ପୋଲିସ ପ୍ରତି ମଧ୍ୟ ପ୍ରଯୁଜ୍ୟ ହେଉଛି। ଅପରାଧ ଅନୁସନ୍ଧାନ, ଅପରାଧ ରୋକିବା, ଆଇନ ଶୃଙ୍ଖଳା ବା ଯେକୌଣସି କାର୍ଯ୍ୟକ୍ରମରେ ଟିମ୍‌ ୱାର୍କ ସବୁଠାରୁ ମହତ୍ତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ।” ସେ କହିଛନ୍ତି- “‘ଜିଲ୍ଲା ସ୍ତରରେ ଯେଉଁ ଏସ୍‌ପି, ରେଞ୍ଜରେ ଯେଉଁ ଅଫିର୍ସର ଅଛନ୍ତି ତଥା ଅନ୍ୟାନ୍ୟ ଦାୟିତ୍ୱ ଥିବା ଆଇପିଏସ୍ ଅଫିର୍ସମାନେ ସେମାନଙ୍କ ଦାୟିତ୍ୱ ଗୁରୁତ୍ୱପୂର୍ଣ୍ଣ । ମୋର ସଂପୂର୍ଣ୍ଣ ବିଶ୍ୱାସ ରହିଛି ଯେ ସେମାନେ ଠିକ୍ ରିଜ୍ୟୁଲେସନ ଭାବେ କାର୍ଯ୍ୟ କରିବେ। ଓଡ଼ିଶା ପୋଲିସ୍‌ରେ ଟାଲେଣ୍ଟର ଅଭାବ ନାହିଁ। ସେମାନେ ନିଶ୍ଚିତ ଭାବେ ଆମ ପୋଲିସ ବ୍ୟବସ୍ଥାକୁ  ଠିକ୍ ଭାବେ ତୁଲାଇବେ। କ୍ଳିନ୍‌ ଆଡମିନିଷ୍ଟ୍ରେସନ ବହୁତ ଗୁରୁତ୍ୱପୂର୍ଣ୍ଣ। ଯେଉଁ ମାଓ ସମସ୍ୟା ରହିଛି ବିଗତ କିଛି ବର୍ଷ ହେବ ଓଡ଼ିଶା ପୋଲିସ ପାଇଁ ଚ୍ୟାଲେଞ୍ଜ ହୋଇଛି।” ପୂର୍ବତନ ଡିଜି କେବି ସିଂହ କହିଛନ୍ତି, ଓଡ଼ିଶାବାସୀଙ୍କ ସେବା କରିବା ପାଇଁ ମୋତେ ସୁଯୋଗ ଦେଇଥିବାରୁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ।”